Domain, hosting aur SSL — teeno kya hain aur aapko kaunsa chahiye
Website ke teen buniyadi hisse, ek-ek karke, bina technical bhasha ke. Aur kaunsa hosting plan aapke liye sahi hai.
Website banwane ja rahe hain to ye teen shabd baar-baar sunenge. Teeno alag cheezein hain aur teeno chahiye. Ek-ek karke dekhte hain.
Domain — aapka pata
Jaise omnihosting.co.in. Ye internet par aapka address hai. Har saal renew hota hai.
Kaunsa lein:
- .com — sabse pehchana hua, kisi bhi business ke liye theek
- .in — Indian business ke liye, sasta
- .co.in — Indian company ke liye
- .org — NGO, trust, society
Naam chhota rakhiye, bolne par samajh aaye, aur hyphen se bachiye. “omni-hosting-patna.com” phone par batana mushkil hai.
Domain hamesha aapke apne naam aur email par register hona chahiye. Ye ek line aapko kabhi bahut bacha sakti hai.
Hosting — aapki dukaan ki jagah
Domain pata hai, hosting wo jagah hai jahan saaman rakha hai. Website ki files, photos, database — sab hosting par rehte hain.
Kaunsa hosting kiske liye
| Type | Kiske liye | Kharcha (saal) |
|---|---|---|
| Shared | Normal business site, blog, 5–20 page | ₹1,500 – ₹4,000 |
| Cloud | Jyada traffic, e-commerce, downtime bardasht nahi | ₹6,000 – ₹18,000 |
| VPS | Custom software, apna control chahiye | ₹9,000 – ₹30,000 |
Zyadatar local business ke liye shared hosting bilkul kaafi hai. Upgrade tab kijiye jab site sach me dheemi pade — pehle se nahi.
Hosting lete waqt ye dekhiye
- Server India me hai ya nahi (Indian visitors ke liye tez rehta hai)
- Roz ka backup hota hai ya nahi
- Support phone par milta hai ya sirf ticket
- Renewal rate kya hai (pehla saal sasta, doosra saal teen guna — ye aam chaal hai)
SSL — wo taala
SSL aapki site aur visitor ke beech ki baat ko encrypt karta hai. Bina iske browser “Not Secure” likh deta hai, jo dekhte hi log bhag jaate hain.
- Basic (DV) SSL — free ya ₹500 tak. Normal business site ke liye theek.
- Business (OV) SSL — ₹3,000 ke aas-paas. Payment lene wali site ke liye.
- EV SSL — bade transaction wale portal ke liye. Zyadatar ko zaroorat nahi.
Business email
gmail.com wala pata business ke liye kamzor lagta hai. info@aapkacompany.com par bharosa zyada hota hai aur ye hosting ke saath hi mil jata hai. Do-teen email se shuruaat kaafi hai.
Sab milakar pehle saal
Ek normal business site ke liye: domain ₹900 + hosting ₹2,500 + SSL free + email included = lagbhag ₹3,400 per year, design alag. Hamare website plans me ye sab pehle saal shamil hota hai.
Ek galti jo mehenga padti hai
Domain aur hosting alag-alag jagah, alag-alag logon ke naam par lena. Renewal ke waqt pata hi nahi chalta kiska kya hai, aur ek din site band ho jati hai. Ek jagah, apne naam par, ek hi email par rakhiye — aur renewal date calendar me daal lijiye.
Want us to look at your site?
We will audit it and tell you the three things holding it back. No charge, no obligation.